DANIEL PADILLA UMAMING SILA NA NI KATHRYN BERNARDO

​Nagpapasalamat kami kay Roxy Liquigan ng Star Cinema dahil isinama niya ang pangalan namin sa listahan ng mga press na dadalo sa bonggang presscon ng Barcelona na kung saan ay sina Kathryn Bernardo at Daniel Padilla ang mga bida.

Sa nasabing presscon ay kapansin pansin ang mga kamay ni Daniel na nakapatong sa makikinis na hita ni Kathryn habang on going ang nasabing presscon at ang dahilan, ayon sa binatang anak ni Karla Estrada, ay iniiwasan lang daw niyang masilipan ang aktres dahil medyo seksi sa gawing harapan ang damit nito.
Mainit at may kilig factor ang nasabing presscon na kung saan ay mariing sinabi ni Daniel na “what you see is what you get” na ang pinatutungkulan ay ang kanilang relasyon ni Kathryn na sinasabing matagal na sila diumano bagama’t hindi nila ito ibinubunyag sa publiko.
Ayon kay Daniel hindi na lang daw sila magsasalita ni Kathryn sa kung ano ang tunay na score ng kanilang relasyon. Hindi naman daw siguro manhid ang mga tao para hindi matunugan kung ano ang kahulugan ng kanilang sweetness sa isa’t isa.
“Walang puwedeng pumasok na third party sa amin ni Kat, exclusive na kami sa isa’t isa,” bitin pa uling sabi ni Daniel sa pagkumpirmang sila na talaga ni Kathryn lalo pa at obvious sa kinikilos at sinasabi nila.
Sa September 14 na ang showing ng Barcelona na pinagbibidahan nina Kathryn at Daniel na inaasahan ng Star Cinema na tatabo sa takilya dahil taglay pa rin ng love team ang kakayahang magpakilig bukod pa sa maganda talaga at napapanahon ang pelikula.
Kita kits po tayo sa mga sinehan ha.
Ni Morly Alinio