ANGELICA PANGANIBAN MAS NAGING MASAYA NANG MULI SILANG MAGKITA NI JOHN LLOYD CRUZ SA HONGKONG

​Walang balikang nangyari pero wala ring sumbatan at pagtatalo nang magkita ang dating magkarelasyong sina Angelica Panganiban at John Lloyd Cruz sa Hongkong noong Holy Week. 
Matagal na ang eksenang pagkikitang iyon na kung saan sa isang gallery ay hindi inaasahang magsalubong ang landas ng dating magkatipan kasama ang iba pa nilang kaibigan na sina Charlene Gonzales at Aga Muhlach. 
Hindi man nagkabalikan o tuluyang natuldukan ang relasyon, para kay Angelica ay masaya na ito sa nangyari at least nagkaroon ng ending ang matagal nang isyung pinag uusapan. 

Ayaw nang idetalye ni John Lloyd kung paano silang nagkita at nagkausap ni Angelica. Maging si Angelica ay ipinakiusap na huwag nang pag usapan pa kung ano ang naging reaction nila ni John Lloyd sa isa’t isa nang hindi inaasahang sila ay magkita. 
Kung noon hindi alam ni Angelica kung saan siya dapat lumugar, ngayon ay alam na alam na ng dalaga. “Yun lang naman ang importante. Yung malaman ng isang tao kung ano talaga ang sitwasyon kasi from there, makakakilos ka nang maayos kung ano ang dapat mong gawin kung alam mo na ang tunay na sitwasyon.” 
Ayon pa rin sa aming source na nakasaksi sa di inaasahang pagkikita nina Angelica at John Lloyd, “Parang wala lang. Civil lang ang lahat. Pero kaipokritahan namang sabihing hindi sila nagulat sa isa’t isa noong magkita. Siyempre nagkagulatan din pero at the end of the day naging maayos ang lahat.” 
Nang dumating daw sa Pilipinas si Angelica mula sa Hongkong ay mas naging masaya at kumportable ang dalaga. “As far as I know walang balikang nangyari. Nagkataon lang na parang dun nagtapos yung relationship nila.” 
Ngayon, kahit magkita pa sila Angelica at John Lloyd mas magiging maayos daw ang lahat sa dating magkasintahan dahil alam nilang ‘napasalamatan’ na nila ang bawat isa sa pagmamahal na ibinahagi nila sa isa’t isa.
Ni Morly Alinio