VICE GANDA, KEBER LANG SA USAPING KONTROBERSIYA SA MMFF 2015!

Ni Glen Sibonga

​Iniiwasan nang maapektuhan ng Phenomenal Box-Office Star na si Vice Ganda sa mga nangyaring kontrobersiya sa nakaraang Metro Manila Film Festival 2015. Kabilang na rito ang pagkuwestiyon sa pagiging topgrosser ng film entry niyang Beauty And The Bestie, na pinagbibidahan nila ni Coco Martin. Nang idine-deadline namin ito ay hindi pa kasi naglalabas ng official ranking at figures ng kinita ng bawat entry ang MMDA.

“Wala naman na akong gustong sabihin doon. Parang sa pagkakataong ito kung mayroon mang nagkamali, ngingiti na lang po ako. Ayoko na ng negative. Sa ngayon po masayang-masayang lang po ako,” sabi ni Vice.
May mensahe ba si Vice para kay Ai Ai delas Alas? May mga patutsada kasi si Ai Ai sa pandaraya umano ng Star Cinema. “Ay, huwag na lang, kasi baka mabigyan na naman ng ibang kulay, di ba? Kasi kahit anong sabihin mo ngayon, kahit anong… nakakatakot na. Kung mayroon man, ako na lang ang magte-text sa kanya kasi nagte-text naman kami e.”
Hindi ba naapektuhan ang friendship nila ni Ai Ai? “I will not allow. Mas maganda yung walang kaaway. Kasi kahit anong gawin mo makakasalubong at makakasalubong mo iyang  mga iyan. Kaysa naman mangawit ka ng kayuyuko pag nakita mo yung mga tao, mas maganda yung deretso lang ang lakad mo at alam mong wala kayong atraso sa isa’t isa.”

Still on Vice Ganda, masayang-masaya lang siya na na-break na naman niya ang sariling record sa box-office sa kinita ng Beauty And The Bestie. Inanunsiyo ng Star Cinema na ito na ang Highest Grossing Filipino Film of All Time dahil kumita na ito ng mahigit sa P500 million at kumikita pa kasi palabas pa sa maraming sinehan nationwide. Na-break nito ang previous record ni Vice sa kanyang MMFF 2014 movie na The Amazing Praybeyt Benjamin, na kumita ng P456 million.
Dahil nga sa bagong record niya sa box-office ay sinasabing siguradong mabibigyan na naman siya ng Phenomenal Box-Office Star award ng Guillermo Mendoza Box-Office Entertainment Awards. Ano ang masasabi ni Vice dito? “Siyempre Guillermo lang ang makakapagsabi nun. Pero siguro… kung ibigay, e di tanggap lang nang tanggap,” ani Vice.
E si Coco naman daw ay posibleng maging Box-Office King? “Oo naman. Pero pwede naman kaming mag-share sa Phenomenal Box-Office Star, di ba? Why not? Kung si Coco naman ang ka-share ko, walang problema.”
Bukas si Coco na magkaroon ng part 2 ang Beauty And The Bestie. Si Vice ba okay din sa ideyang ito? “Oo naman, gusto ko naman. Kanina nga nakita ko yung picture niya sa Ang Probinsyano na naka-Paloma siya, sabi ko parang magandang idea yung pagsamahin si Paloma at si Praybeyt Benjamin.”
Habang hindi pa sigurado ang sequel ng Beauty And The Bestie, ibinalita ni Vice na may dalawang pelikula na siyang siguradong gagawin ngayong taon na co-produced ng Star Cinema at Viva Films. “Iyong isa iyong sa amin ni Daniel (Padilla). Magkapatid kami doon. Iyong isa hindi ko pa alam kung sino ang kasama ko.”

---